مع قربنا من موسم الكشتات وطلعات البر ومع بداية تحسن الأجواء في الفترة الحالية خصوصًآ في الليل وبعيد عن المدينة، لازم تصير شقردي الكشتة اللي عنده مجموعة معلومات وحيل مفيدة في الكشتات.

يمكن تضحك بس الصدق أهم شيء في كل كشتة هو الملح والسكر خلك حريص دائمًا تجيب معك الثنائي هذا، ما تدري يمكن أحد ينساهم وتكون أنت منقذ الطلعة السري 😌.

نقطة مهمة لازم تنتبه لها وهي نظافة المكان، لا تشيل هم ما راح نتكلم بشكل عام بنعطيك كم طريقة تساعدك في هذه المهمة وتبسطها لك:

١-تقدر تجيب كيس وتربطه على مراية السيارة أو في حال عندكم شنكار أو الحديدة الموجودة في نهاية السيارة الخلفية للسحب راح تكون مناسبة جدًا، مع بداية الطلعة أربط الكيس بشكل قوي وإذا خلصتوا ارموها في أي حاوية في الطريق.

٢-إذا يهمك الترتيب أكثر تقدر تشتري حاوية بلاستيكية وترمون فيها المخلفات بتأدي نفس غرض الكيس لكن بتتعبك في الغسيل إذا رحت البيت.

موصى به

 احتفالات السويدي تحرك مشاعر الوطن العربيإبداع السعوديين في مسابقة تصميم أكواب القهوةسماء جازان مرصعة بالفوانيس المشعة

في حال ما كان معكم ثلج وتبي تبرد مشروباتك فيه طرق كثير ولكن بنعطيك طريقتين سهلة وسريعة:

١-إذا الجو بارد شوي وفيه هواء خفيف تقدر تحط المشروبات فوق السيارة من بدري ومع مرور الوقت بتصير باردة ولذيذة بسبب تيار الهواء المرتفع.

٢- وفي حال كان الجو ممطر أو سبق وجا مطر في المنطقة تقدر تحط مشروباتك في كيس وتدفنها في الرمل، المطر بينزل درجة حرارة الأرض وهذا الشيء بيبرد مشروباتك بس إنتبه تضيع الحفرة وتتحول طلعتكم إلى فعالية البحث عن الكنز 😅.

معلومات مهمة في حالات الطوارئ:

في حال غرزت سيارتك لا تحاول تدعس بنزين إذا الكفرات تحت التراب، كل اللي عليك تسويه تحفر قدام وخلف الكفرات وتتأكد من تنسيم الكفرات كلها بشكل معقول وإن مافي جزء من السيارة تحت الرمل ثم تدعس على خفيف وغالبا بتطلع السيارة معك، وفي حال ما قدرت تسوي شيء تواصل مع إنجاد فريق تطوعي مدعوم من الدفاع المدني، مجموعة شباب وظيفتهم الفزعة ومساعدة الناس في المواقف الصعبة والمستعصية.

نصيحتين من القلب:

١-مهما كنت شقردي لا تغامر في التطعيس ولا تستهين بالسيول ومجاريها لازم تكون مركز ومفتح عقلك أنت في النهاية طالع تفرح وتغير جو 🥹.

٢-في حال جلست في مكان مو نظيف مره هذا الشيء ما يعطيك الحق أبدًا في إنك تكمل عليه وتزيده مخلفات خلك أحسن من غيرك وأترك المكان أفضل أو مثل ما كان، أرجوك حافظ على البيئة 🥺.

لا تنسون شاركونا كشتاتكم الرهيبة على #lovinsaudi