وزارة الرياضة تعلن استراتيجية دعم الأندية
وزارة الرياضة تعلن استراتيجية دعم الأندية
وزارة الرياضة أعلنت عن استراتيجية دعم الأندية في الموسم الرياضي الجاي، الهدف من استراتيجية الدعم استدامة الاندية الرياضية ماليًا وإداريًا، بيختلف الدعم عن المواسم الماضية وبيكون فيه تحديثات جديدة يعني بنشوف دعم حكومي مختلف وتطوير مشروط للألعاب المختلفة والمنشآت راح تتطور أكثر وبيتفعل التحول الرقمي.
📄| وزارة الرياضة تُعلن عن #استراتيجية_دعم_الأندية في عامها الرابع للموسم الرياضي 2022 – 2023: pic.twitter.com/CNxwpUKMFR
— وزارة الرياضة (@gsaksa) July 30, 2022
الدعم المباشر والمبادرة الحكومية
ما فيه تغير كبير بالدعم المباشر لأندية دوري المحترفين كل نادي بياخذ ٥٠ مليون ريال بالسنة وبالنسبة لأندية دوري يلو زاد لهم الدعم مليون ونص وصار لكل نادي ٦.٥ مليون ريال بالسنة أما أندية الدرجة الثالثة بياخذون ٣ مليون ريال.
المبادرة الحكومية للتصنيف الإداري بتطبق على ١٧٠ نادي بدل من ٦٤ بدون ما يتم النظر لوش تصنيف النادي أو في أي درجة يلعب، فئة (أ) بيكون لهم هامش أكثر للإجراءات والتدابير الحكومية لادائها المالي والإداري والرياضي أما فئات ( ب-ج—د-هـ) بتتقيم من ٧ على كل معيار والفئة الأخيرة (و) بيكون لهم جلسات تدريبة وعمل مستمر لتتأهل للفئات الأعلى.
دعم سنوي مباشر لأندية الدرجات الثلاث:
💰: 50 مليون ريال لكل نادٍ في @SPL
💰: 6.5 مليون ريال لكل نادٍ في @FDL_KSA
💰: 3 ملايين ريال لكل نادٍ في @SDL_SAUDI #استراتيجية_دعم_الأندية 🇸🇦 pic.twitter.com/nsStU9bseW— وزارة الرياضة (@gsaksa) July 30, 2022
الألعاب المختلفة
بتكون ميزانية الألعاب المختلفة ٤٧٤.٥ مليون ريال لكن لازم الأندية تحقق معايير محددة عشان تحصل على الدعم وهي:
١- تقدم نموذج للرياضات المفعلة مع خطة مفصلة لكل رياضة
٢- تفعيل ١٢ رياضة
٣- تنافس في ٦ ألعاب مختلفة للكبار
٤- تنافس في ٦ ألعاب مختلفة للفئات السنية
٥- تطور ٨ ألعاب مختلفة للفئات السنية
الرياضات المختلفه مقسمة على ٣ فئات ( أ- ب -ج ) وفيه ٣ معايير عشان ياخذون النقاط وهي: عدد الرياضات المفعلة وعدد الرياضيين الممارسين و عدد اللاعبين في كل نادي.
بيتخصص ٤٢.٥ مليون للدعم التحفيزي للفئات السنية.
الدعم للحضور الجماهيري
خصصت ميزانية ٢٤٠ مليون ريال للحضور الجماهيري بس لأندية دوري المحترفين وبتكون موزعة بحسب نسبة الحضور.
ملاعب تكفي أقل من ١٥ ألف مشجع
بيكون دعم الحضور الجماهيري لهذي الملاعب إذا كان الحضور من ٣٠٪ -٥٠ ٪ بياخذ النادي ١٠٠ ألف ريال أما في حال نسبة الحضور كانت ٩٠٪ بياخذ مليون ريال.
ملاعب تكفي أكثر من ١٥ ألف مشجع
الدعم بيكون بنسبة مختلفه لهذي الملاعب لكبر مساحة مدرجاتها يعني عشان تاخذ الأندية ١٠٠ ألف الحضور لازم يكون ٢٠٪ أما إذا يبون المليون عاد ٨٠٪ من سعة المعلب ضروري تمتلي.
تطوير المنشآت والتحول الرقمي
١٦٠ مليون ريال عشان يتم تطوير منشآت الأندية الرياضية وتكون بشكل حلو ومناسب، صار لازم كل الاندية تواكب التطورات وتتعامل مع الوزارة بالتحول الرقمي وبياخذ كل نادي ٥٠٠ ألف ريال على أربع دفعات عشان يتم تطبيق هذا الأمر وتطويره.
