محد يختلف بأن مفهوم البودكاست بشكله الحالي هو مفهوم حديث عربيًا وتحديدا خليجيًا، دخل بشكل جميل ومميز كثقافة “نشر الفائدة” بشكل ممتع يناسب نمط الحياة الحالي اللي تسيطر التقنية على جزء كبير منه، فالثقافة لجني المعلومات والفوائد ما عاد صارت تقتصر على كتاب تتصفحه بين يدينك وانت جالس في السيارة ولا في غرفة الانتظار!  قد تكونين جالسة تسوقين مثلا وانتي تستمعين ببودكاست عن تفاصيل جريمة معقدة، او قد تكون جالس تحضر لك ساندويتش قبل محاضرتك وانت منغمس في بودكاست علمي ..

وهذا الجميل في البودكاستات! صحيح بأن أهدافها في الغالب وحدة ومشتركة، إلا أنها متنوعة ومختلفة وتقدم أكثر من لون وتتخصص في أكثر من مجال .. وفترة عن فترة جالسين نلاحظ تميز البودكاستات على مستوى المملكة فضلا عن ظهور الجديد منها. 😍

حاليًا نستهدف أصحاب البزنس، سواء رواده .. أو المبتدئين فيه، او المهتمين به مجرد اهتمام، تعالوا لنا اليوم أنتم فئتنا المستهدفة اللي راح تستفيد من هذا المقال.👇🏼 خصصنا لكم، وبعد اطلاع متوسع عن أكثر بودكاستات الأعمال تميز وفائدة يقدمون لكم أصحابها خبرة حقيقية وتجارب وقصص لا يمل منها..🤩

موصى به

ألذ مقلقل في الرياضأفضل 5 مولات للمشي بالرياضجبال بركانية في السعودية!

• سوالف بزنس

أسلوب المقدم مشهور الدبيان لا يعلى عليه، مرات يكون الأسلوب مع المحتوى اللي عليه القيمة هو أفضل متعة سمعية ممكن تحصل عليها في يومك، بودكسات خفيف يكشف لك تحديات المشاريع التقنية سريعة النمو، ومن حلقاتهم الجميلة سالفة الاستثمار في المشاريع الناشئة.

• فنتك السعودية

لكل التطورات الحديثة والمستجدة لقطاع التقنية المالية في المملكة، هالقطاع يوم عن يوم يشهد قرارات مفصلية لمستقبل المملكة المالي واللي يمثل أحد اهم مستهدفات الرؤية، من حلقاتهم الجميلة أسلوب الحياة والفنتك.

• وادي عبقر

بودكاست مهتم بريادة الاعمال ولكن من زوايا مختلفة، ياخذك لماضي الجزيرة العربية ويقص عليك من تاريخها بمعلومات جميلة ومختصرة مربوطة بواقع البزنس السعودي في وقتنا الحالي.

• التماس

لو حاب تضبط وضعك القانوني في الشغل تابع هالبودكاست اللي يفتح مخك على الجوانب القانونية في قطاع الاعمال، لأن المحاورين هم “المحاميين”حسان السيف ومحمد البيز، من حلقاتهم الجميلة جراحة التجميل.

• جينا

لو حاب تسمع عن التسويق مع أسامة الرشيد او تتعرف على مجال الرسوم المتحركة مع مالك نجر او حتى تسمع حلقة مؤسس مطعم كودو فهذا البودكاست راح يعجبك بكل تأكيد! خبرات وقصص تثريك بمعنى الكلمة.

• قهوة منشآت

هذا اقتراحنا الأخير لكم عن افضل البودكاستات في مجال الاعمال، منشات دائما مبدعين في تقديمهم للطرح أيًا كان شكله، والاجمل هو تخصصهم بالمنشات الصغيرة والمتوسطة اللي تمثل الحصة الأكبر والاضخم من منشآت المملكة، أخيرا لا تنسون!! .. لو عندكم حلقات ما تتفوت في مجال الاعمال، نرجوكم تغششونا فيها!