أفضل 4 أماكن للتنزه في جدة خلال الصيف
بالرغم من حرارة الصيف الحارقة إلا أن معظمنا يحب يعيش أجواء الصيف سواءً نزهة بريّة أو بحرية.. وكمدينة ساحلية مثل جدة فمعظم الناس يتجهون للساحل ولكن في أماكن جميلة ونادرة للتنزه البريّ مع الأصدقاء أو العائلة أو حتى لوحدك إذا حاب تشوف غروب الشمس مع مشروب بارد ينعش صيفك وتجربة بعض المقبلات اللذيذة اللي بتخليك ترجع بس عشان تتذوقهم مرة ثانية.. خلونا نشوف الاماكن سوا
أفضل 4 أماكن للتنزه في جدة خلال الصيف
4. مدينة الملك عبدالله الاقتصادية
إذا كنت من محبين كسر الروتين والخروج خارج المدينة شوي فهذي التوصية لك خصيصًا.. الأجواء فمدينة الملك عبدالله الاقتصادية مع الغابات والأشجار هي تحفز وتحلي النزهة شوي شوي ولا ننسى الواجهة المائية والمنتزهات مع فود ترك المطاعم المختلفة بيخليك تفكر ترجع تتنزه فيها مره ثانية
3. جبل القمر
رحلة قصيرة لوسط مدينة جدة في جبل القمر، يقال أن سبب تسميته بالاسم هذا هو مناظره الطبيعية اللي أول ما تشوفونه بتقولون “هذا قمر الأرض” ومو بس المناظر الأرضية حتى يمديك تتسلق الجبل وتتأمل النجوم ولحظة الغروب وجمال طبيعة وصنع الخالق وحتى الجو في المساء مو بذاك الحرارة لذلك يمديك تتنزه وبعدها تجلس مع قهوتك والسناكات لتأمل النجوم
2. الغابة الشرقية
للأسف هذا المكان جميل جدًا ولكن مو معروف بشكل كبير في جدة ولكن من الجانب الإيجابي فهذا المكان هو الأنسب والأفضل لمحبين الهدوء والاستمتاع لوحدهم. تُعرف الغابة الشرقية باسم “غابة جدة” وتتميز برضوا بانها واحة خصبة في وسط الصحراء وتحتوي على أكثر من 80 ألف نبتة وهي برضوا موطن للحياة البرية.. بالرغم أن الغابة في وسط الصحراء إلا أن المكان عبارة عن واحة خضراء ومع تغريد العصافير والفراشات بتشوف هذا المشهد كأنه رواية أو فلم.. تنويه: في أماكن ممتازه للمراقبة والاستمتاع بمناظر الغابة بأكملها بس أنت جهز أغراضك واشحن جوالك وتعال
1. كورنيش جدة
بتتسائل ليش اخترنا كورنيش جدة الرقم الأول لأفضل الأماكن من وجهة نظرنا؟ لأنه واحد من أفضل الكورنيش في البلد بأكمله وهو برضوا المكان المثالي اللي بيخليك تفرش فرشة البحر وتقضي اليوم طوله مسترخي.. الواجهة البحرية هي أحد الأماكن السياحية المشهورة في المملكة وتجذب السياح بشكل كبير وفيه مطاعم ونوافير وحدائق وأشياء ماتعد ولا تحصى.. تنويه: جهز الكاميرا لتصوير نافورة الملك فهد مع غروب الشمس
